- وسائل التعلم الذاتى الكتب /الكورسات فى مقابل الكوتشينج .
- تحديات التطور بعد كل طريقة .
لما كنت بواجه مشكلة مزمنة وكل محاولاتى لحلها وحسمها ماتشتغلش.. بلاقى السؤال عندى :
هى الغلطة فين ؟! .. انا محتاجة اعدل ايه عندى جوة او برة ..ايه اللى فى ايدى ؟
وبلاقى نفسى قدامى ٣ خيارات :
- اروح اقرأ كتاب عن الموضوع
- او اخد كورس متعمق فى الامر
- او اخد جلسة كوتشينج فردية .
فى رحلة التطور الذاتى بتاعتى اتعلمت من الثلاثة الحقيقة … و ده خلانى اعرف اشوف كل طريقة حستخدمها امتى وازاى …
******
الكتاب او الكورس : بيصححلى معلومات ساعات بتكون هى المشكلة وبناء على تحديث المعلومات عندى انا تصرفى ورد فعلى بيتطور وبيفرق فى اختياراتى جدا .. وبعرف الغلطة عندى كانت فين بسبب غياب المعلومات او تصوراتى الخاطئة .. والمشكلة بتتحل او تمشى بعيد عنى حرفيا ..لان عينى فتحت !! …
لكن فى أوقات الحقيقة رغم إنى قريت او اتعلمت .. بلاقى المسافة بينى وبين الحلول وتطبيق المعلومات الجديدة بعييييدة اووى …
ده فى عك حاصل عندى وأنا مش دريانه ..الموضوع مش بسيط بالنسبة لى ..
ووقتها كان بيحصل حاجة من اتنين :
ياما بقف ..وادخل فى حبة احباط حلوين ومحترمين كده …لغاية ماطلع لنفسى خطوة بسيطة تحركنى من مرحلتى الحالية.. وده كان بياخد وقت على فكرة !! .. بس كان بيهمنى إنى اتحرك لان فى الحركة خبرة وتعلم وتفتح الدنيا بعد كده بإذن الله …
ياما بتحرك ع طول وتفتح مشاكل اكتر وتبقى بجملة المشاكل وده كان بيعمل ضغط كبير وكان بيرجعنى لنقطة إنى اعرف الخطوة المناسبة حاليا لمرحلتى وابدا بيها بعد ماكنت خدت وقت برضه فى ضغط وتعلم ..
الكوتشينج :
الكوتشينج هو مساحة التعلم اللى كان فيها ميزة اختصار الوقت والمجهود وتجنب عطله واحباط ممكن يحصلوا..لانى سواء كنت قارية او واخدة كورس او لا فى المشكلة بتاعتى كنت بطلع من الكوتشينج بالخطوة المناسبة لمرحلتى الآن واللى حتحركنى باتجاه هدفى واتجاه التعافى من المشكلة .. حتى لو مش حتحل مشكلتى مباشرة …و برضه كان بيحصل فى احيان إنى اطلع بخطوة واضحة تحل ونخلص ..وده من خلال مساحة التعبير الآمنة اللى بتكون متاحة من غير أحكام واللى ساعدتنى على التواصل مع مشاعرى و فهم احتياجاتى الحقيقية ووضوح خياراتى المناسبة لى فى مرحلتى وتحفيز تفعيل المعرفة الموجودة عندى بالفعل .
عشان كده بشوف الكوتشينج كطريق تعلم هو اكتر حاجة حركتنى وخرجت منه مركزة فى خطوتى المرحلية التالية اللى بعدها بشوف تطور بشكل واقعى .
اتعلمى بالطريقة اللى أنتى عايزاها وتناسبك ..المهم تتعلمى وتتحركى …
وافتكرى انك مهما وقفتى ..دى استراحة عادى عشان نرجع للسعى من جديد .
- الكتب والكورسات مفيدة فى نمو المعلومات
- الكوتشينج بيفرق فى اختيار الخطوة المناسبة وتفعيلها .
